IKTez hausnartzen

Gaur egun ezinbestekoa da ume bakoitzak ordenadore bat edukitzea? ez al da nahikoa dakarten tableta, sakelakoa...? Krisi ekonomiko latza pairatzen ari garela besterik ez dugu entzuten, eta gobernuari ez zaio, bada, bururatu ume bakoitzari ordenadore bat oparitzea? IKTekin aurreratuarena egitera jolasten ari gara, eta ez al dira oraindik konturatu punta-puntako teknologia erabili arren, gure hezkuntza sistemak ez duela fruiturik ematen?
Egia da IKTek asko lagun gaitzaketela eskolan, baina sartzearekin bakarrik ez dugu ezer lortuko. Egun, ikasle askok irakasleak baino askoz gehiago daki IKTei buruz. Hori dela eta, irakasle asko beldurrak airean dabiltza. Gure analfabetismoak ez digu lagatzen IKTei behar besteko zukua ateratzen, eta uste dut hori dela gure erronka nagusia. Hasteko, guk geuk formatu behar dugu, eta zer, nola eta zertarako erabiliko ditugun erabaki.
Askotan entzun dugu -eta hala izango da- hezkuntza sistemarik onena Finlandiakoa dela. Finlandia, teknologia mailan front-runner-a da, datu bat aipatzearren, 5 milioi biztanle dira, eta 6 milioi sakeleko baino gehiago erabiltzen dituzte, hau da, 1,2 telefono buruko. Zer esan nahi dudan horrekin? Bada, IKTak ondo erabiltzen baditugu, urrutira irits gaitezkeela; aitzitik, IKTak sartzearekin bakarrik ez dugu aurrera egingo, eta hezkuntza sistema irauliko.
Egiten duguna egiten dugula, kontziente izan behar dugu zertarako erabili behar/nahi dugun. IKTak ez dira 21.mendeko miraria, egia da ikaskuntza bera erakargarri egin dezaketela eta laguntza handia eman diezaguketela, baina tentu handiz erabili behar ditugu klik soil batekin urrutira irits baikaitezke.